حوزہ نیوز ایجنسی کی رپورٹ کے مطابق، حجۃ الاسلام والمسلمین ناصر رفیعی نے امام جعفر صادق علیہ السلام کی احادیث کی روشنی میں کہا کہ جو شخص اپنی دولت کو بے جا خرچ کر کے ضائع کر دیتا ہے، اس کے بارے میں امامؑ نے فرمایا کہ ایسے انسان میں کوئی خیر نہیں، کیونکہ وہ اپنے مال کی حفاظت نہیں کرتا۔
انہوں نے ایک واقعہ بیان کرتے ہوئے کہا کہ ایک شخص امام جعفر صادقؑ کی خدمت میں حاضر ہوا اور عرض کیا: "میرے پاس مال تھا، لیکن سب ضائع ہو گیا، آپ دعا کریں کہ اللہ مجھے دوبارہ دولت عطا فرمائے۔"
امام صادقؑ نے فرمایا کہ چند لوگوں کی دعائیں قبول نہیں ہوتیں۔ ان میں ایک وہ شخص ہے جو فضول خرچی کرکے اپنا مال برباد کر دے اور پھر اللہ سے مزید مال مانگے۔ اللہ تعالیٰ فرماتا ہے: کیا میں نے تمہیں اسراف سے منع نہیں کیا تھا؟ پھر تم نے میری ہدایت پر عمل کیوں نہیں کیا؟
حجۃ الاسلام ناصر رفیعی نے مزید بتایا کہ امامؑ کے مطابق دوسرا وہ شخص ہے جو محنت اور کام کیے بغیر صرف رزق کی دعا کرتا رہے، جبکہ تیسرا وہ ہے جو کسی کو قرض دیتے وقت کوئی تحریری ثبوت یا دستاویز نہ لے اور بعد میں اپنے نقصان پر افسوس کرے۔
انہوں نے زور دیا کہ اسلامی تعلیمات انسان کو دعا کے ساتھ ساتھ تدبیر، محنت، کفایت شعاری اور مالی معاملات میں احتیاط اختیار کرنے کی بھی تلقین کرتی ہیں۔
آپ کا تبصرہ